EGK [eus] :: Hasiera
2016-04-28

"Zer aukera ematen ditu euskarak elkarrenganatzeko? Nola aurrera egin?" galdera abiapuntutzat hartuta Zubideiakeko Talde Eragileak gune ireki bat antolatu du maiatzaren 7rako Leioako Campusean 9:30etik 18:00etara. Asmoa bertaratzen diren eragileen artean elkarrizketa soziala burutzea da euskara, aniztasuna eta bizikidetza ardatz hartuta.

2016-04-28

Lan Osasunaren aldeko Nazioarteko Egunaren atarian "gazteok pairatzen dugun prekarietatea eta honek gure ongizatean dituen ondorio latzak salatu" nahi izan dituzte Euskadiko Gazteriaren Kontseiluak (EGK) eta enplegua eta gazteria lantaldean batzen diren hainbat elkartek, kolektibok eta sindikatuk. Aho batez idatzitako manifestuan "pertsona gazteok lan kondizio txarrenak" izaten jarraitzen dutela azpimarratu nahi izan dute. Laneko Segurtasun eta Osasunerako Osalan euskal Erakundearen datuen arabera, honek gazteon osasunean eragina du eta “gazteek lan istripu bat pairatzeko duten arriskua batez bestekoaren bikoitza” izatea ekartzen du. Hori dela-eta, 15 erakundek euren ahotsak batu dituzte adostutako komunikatuan "Gazteon osasunagatik prekarietatearekin amaitu" lelopean.

2016-04-27

Atzo burutu zen Gasteizko El Pilar Gizarte Etxean "Emakume gazteak eta lan-mundua" Hiruburua non gazteak, politikariak eta teknikariak elkartu ziren gaiari, honen arazoei eta hobekuntzarako proposamenei buruz hitz egiteko. Ondorio nagusia genero ikuspegia txertatu behar dela izan zen lan-munduaz pentsatzen dugunean eta lan-munduaren diseinuan, eraikuntzan eta kudeaketan aritzen garenean. Hau hasiera besterik ez da! Hiruburuan lortutako ondorio guztiak batu egingo ditugu eta urte honetan zehar burutzen ari garen diagnosiarekin batera aurkeztuko ditugu.

2016-04-25

Gazteon parte-hartzeko ditugun espazioak, berri eta zaharrak, hamaika direlako (elkarteak, sare sozialak, gazte lokalak, gaztetxeak eta beste hainbat), Eusko Gasteriaren Kontseilutik Gazterpe lantaldea martxan jarri genuen gaia jorratzeko. Parte-hartzea gazteon ongizatea hobetzeko aukera dela uste al duzu? Nola parte-hartzen duzun kontatu nahi al diguzu? Elkarrekin lan egin dezakegula uste baldin baduzu hau da zure taldea! Esatekoa duzulako animatu eta parte hartu! Maiatzaren 5ean, 17.00etan EGK-k Bilbon duen bulegoan egongo gara zure zain.

2016-04-19

Astialdi Foroak, EGKren barnean elkartzen diren 17 euskal astialdi eskolek eta 10 federaziok, 'Boluntariotza argazki lehiaketa' antolatu zuen 2015eko abenduan eta aurkeztu ziren irudi hoberenak erakusketa batean egongo dira orain. Lehenik Gasteizen ikusgarri egon ostean, orain argazkiak Bilboko La Bolsa aretoan erakutsiko dira apirilaren 15etik 29ra. Ordutegia honakoa izango da: astelehenetik ostiralera 8:30etik 21:30era, larunbatetan 9:00etatik 14:00etara eta igandetan itxita egongo da. Azkenik erakusketa Donostiara iritsiko da.

Diru-laguntza eman dute:

 

Eusko Jaurlaritza            Bizkaiko Aldundia     Gazte Bizz     Gipuzkoako Aldundia